Gen 18 | NdeIBE | STEP | UJehova wabonakala ku-Abhrahama eduzane lezihlahla ezinkulu zikaMamure, ehlezi emnyango wethente lakhe, ilanga litshisa kakhulu.

Genesis 18

Izethekeli Ezintathu

1 UJehova wabonakala ku-Abhrahama eduzane lezihlahla ezinkulu zikaMamure, ehlezi emnyango wethente lakhe, ilanga litshisa kakhulu.

2 U-Abhrahama waphosa amehlo wabona amadoda amathathu emi eduze. Wonela ukuwabona wasuka ngokuphangisa emnyango wethente lakhe wawahlangabeza wafika wakhothama phansi.

3 Wathi, “Aluba ngifumene umusa kuwe, nkosi yami, ungedluli eceleni kwenceku yakho.

4 Wothani kulethwe amanzana nje, ukuze lonke ligeze izinyawo zenu, keliphumule ngaphansi kwesihlahla lesi. 5 Wothani ngilidingele ukudla ukuze lizuze amandla anduba liqhubeke ngohambo lwenu – njengoba manje selizile encekwini yenu.” Baphendula bathi, “Kulungile, yenza lokho okutshoyo.”

6 Ngakho u-Abhrahama waphanga waya ethenteni kuSara. Wathi, “Phangisa, thatha izilinganiso ezintathu zefulawa ecolekileyo, ucube inhlama wenze isinkwa.”

7 Waphanga waya emhlambini wakhetha iguqana elihle, elibuthakathaka walipha isisebenzi ukuba silebule. 8 Waseletha izankefu zamasi, lochago kanye leguqana elaselilungisiwe konke wakuthi qithi phambi kwabo. Bathi besidla yena wema eduzane labo ngaphansi kwesihlahla.

9 Bambuza bathi, “Ungaphi umkakho uSara na?” Wathi, “Laphayana, ethenteni.”

10 UJehova wasesithi, “Ngizabuya ngempela kuwe ngalesisikhathi ngomnyaka ozayo, loSara umkakho uzakuba lendodana.” USara wayelokhu elalele esemnyango wethente elalingemuva kwakhe.

11 U-Abhrahama loSara basebebadala sebeleminyaka eminengi, uSara esedlule isikhathi sokuzala abantwana. 12 Yikho uSara wahleka yedwa, wakhumbula wathi, “Kambe sengiphelile kanje lenkosi yami isindala, ngingayikhona ngizuza intokozo le?”

13 UJehova wasesithi ku-Abhrahama, “Kungani uSara ehlekile njalo wathi, ‘Kambe sibili ngizakuba lomntwana mina sengiluphele?’

14 Kambe kulolutho yini olwehlula uJehova na? Ngizabuya kuwe ngesikhathi esimisiweyo ngomnyaka ozayo, lapho uSara azazuza khona indodana.”

15 USara wesaba, yikho waqamba amanga wathi, “Kangizange ngihleke mina.” Kodwa wathi, “Ye, uhlekile.”

U-Abhrahama Uncengela iSodoma

16 Amadoda asuka ahamba aqonda eSodoma, u-Abhrahama wawaphelekezela ukuwakhupha.

17 UJehova wasesithi, “Ngimfihlele yini u-Abhrahama lokho esengizakwenza na?

18 Ngempela u-Abhrahama uzakuba yisizwe esikhulu esilamandla, njalo zonke izizwe emhlabeni zizabusiswa ngaye. 19 Ngokuba sengimkhethile, ukuze aqondise abantwabakhe lomuzi wakhe, yena esedlule, ukugcina indlela kaJehova ngokwenza okulungileyo lokuqondileyo, ukuze uJehova amenzele u-Abhrahama lokho amthembise khona.”

20 UJehova wasesithi kuye, “Insolo ngeSodoma leGomora inkulu kakhulu njalo isono sakhona siyesabeka 21 okokuthi sengizakuya khona ngiyobona ingabe lokho abakwenzileyo kubi okulingana lensolo le esifikile kimi. Nxa kungenjalo, ngizakwazi.”

22 Amadoda akhangela phambili aqonda eSodoma, kodwa u-Abhrahama wasala emi phambi kukaJehova. 23 Yikho u-Abhrahama waya kuye wathi: “Uzakhucula abalungileyo kanye lababi na? 24 Pho nxa kukhona abangamatshumi amahlanu kulelodolobho-ke? Ngempela uzawukhucula na ungalixoleli ngenxa yabangamatshumi amahlanu abalungileyo abakulo na? 25 Akube khatshana lawe ukwenza into enjalo – ukubulala abalungileyo lababi. Kakube khatshana lawe lokho! Kambe uMahluleli womhlaba wonke kayikwenza okufaneleyo na?”

26 UJehova wathi, “Uma ngifumana abangamatshumi amahlanu abalungileyo edolobheni laseSodoma, ngizalixolela lonke idolobho ngenxa yabo.”

27 Yikho u-Abhrahama waphinda wakhuluma njalo wathi: “Njengoba sengibe lesibindi esingaka sokukhuluma loJehova, loba ngingasulutho mina, ngiluthuli nje lomlotha,

28 pho uma inani labalungileyo lingaphansi ngabahlanu ematshumini amahlanu? Uzalibhubhisa idolobho lonke ngenxa yabantu abahlanu na?” Wathi, “Ngingafumana abangamatshumi amane lanhlanu kangiyikulibhubhisa.”

29 Waphinda njalo wakhuluma laye wathi, “Nxa kufunyanwa amatshumi amane kuphelake?” Yena wathi, “Ngenxa yabangamatshumi amane kangizukukwenza.”

30 Yikho wasesithi, “UJehova makangathukutheli, kodwa ake ngikhulume. Kungafunyanwa khona amatshumi amathathu-ke?” Waphendula wathi, “Kangizukukwenza ngingafumana khona amatshumi amathathu.”

31 U-Abhrahama wathi, “Kambe njengoba ngibe lesibindi esingaka ngaze ngakhuluma loJehova, pho uma kufunyanwa abangamatshumi amabili khona kuphela-ke?” Wathi, “Ngenxa yabangamatshumi amabili kangiyikulibhubhisa.”

32 Yikho wasesithi, “UJehova angathukutheli, kodwa ake ngikhulume kanye kuphela njalo. Kambe nxa kungafunywana itshumi lodwa-ke?” Waphendula wathi, “Ngenxa yabalitshumi kangiyikulibhubhisa.”

33 Kwathi uJehova eseqedile ukukhuluma lo-Abhrahama wasuka, lo-Abhrahama wabuyela ngekhaya.